De 7. Juli hu mir am NOSL eist Schouljoer mat engem Summerfest ofgeschloss, an dat am Kader vun eisem Projet d'établissement "Meng Kultur, deng Kultur, eis Kultur"

Méi wéi 580 Schüler hunn u 36 Atelieren deelgeholl, dorënner kreativ a sportlech Aktivitéiten – vun Upcycling-Coasters bis Krav Maga, vun Insektenhoteller bauen bis Escape-Room, vu Beachvolleyball bis Theater, Zirkus, Vikingerschach, SeedBombs, a villes méi. Trotz där eng oder anerer Dusch vun uewen , war d’Stëmmung gutt an eis Schüler hu mat Begeeschterung matgemaach – Zesummenhalt, Freed a Beweegung stoungen dësen Dag am Mëttelpunkt!

Am Nomëtten goufen dunn an der Aler Seeërei d’Diplomer un eis élèves méritants verginn – Bravo  fir hire Fläiss, Asaz an Engagement! En absolutten Highlight waren eis Schüleroptrëtter : d’Schüler déi dëst Joer um Hip Hop Marathon deelgeholl hunn, hu mat hirem Optrëtt - e Mix aus Danz, Beats a Rhythmus - fir déi richteg Stëmmung gesuergt. Och eis Schüler déi dëst Joer Djembé an Capoeira geléiert hunn, hu gewisen, wéi vill Talent a Passioun an hinne stécht!

E grousse Merci fir dësen Dag geet un:

• eis engagéiert Enseignanten a Personal, déi dësen Dag erméiglecht hunn

• déi extern Veräiner an Organisatiounen, déi eis ënnerstëtzt hunn (Bsp. Naturverwaltung, Natur an Ëmwelt, ...),

• eis Schüler, déi och selwer Atelieren encadréiert hunn

• an natierlech all eise Schüler fir d’Matmaachen! 

E puer Impressiounen vu dësem gelongene Summerfest fannt dir ➜ hei!